ՄԻԱՎ-ով վարակվելիս մարդկանց մեծ մասի մոտ որևէ գանգատ կամ նշան չի առաջանում կամ կարող են զարգանալ թույլ գրիպանման ախտանիշներ։
Նման դեպքերում ՄԻԱՎ-ը վիրուսային այլ վարակներից տարբերակելը խիստ դժվարանում է։ ՄԻԱՎ-ի վաղ ախտանիշները հաճախ սկսվում են վարակվելուց 10-14 օր անց։ Այս շրջանում (կոչվում է «սերոկոնվերսիոն» փուլ) կարող են ի հայտ գալ հետևյալ գանգատները՝
ջերմության բարձրացում
ընդհանուր թուլություն
գլխացավ
մկանա-հոդացավեր
ցավեր ըմպանում
պարանոցի, թևատակի և աճուկային շրջանների ավշային գեղձերի այտուցվածություն
մաշկային ցան։
Այս նշանները շուտով վերանում են, սակայն ՄԻԱՎ-ը մնում է վարակված մարդու օրգանիզմում։
ՄԻԱՎ-ի վաղ նշանները կարող են պատճառվել նաև այլ հիվանդություններով։ Սակայն, եթե դուք կարծում եք, որ կարող էիք վարակվել ՄԻԱՎ-ով, առանց ուշացնելու դիմեք ձեր բժշկին կամ ՁԻԱՀ-ի կանխարգելման կենտրոն։
Ձեզ մոտ ՄԻԱՎ-ով վարակվելու ռիսկը կարող է բարձրանալ, եթե՝
սեռական հարաբերություն ունենալիս չեք օգտագործում պահպանակ
դուք տղամարդ եք և սեռական հարաբերություն եք ունեցել տղամարդու հետ
դուք սեռական հարաբերություն եք ունեցել այպիսի մարդկանց հետ, ովքեր ժամանել են ՄԻԱՎ-ի բարձր տարածվածությամբ երկրներից
դուք օգտագործում եք ապօրինի կամ տնայնագործական մեթոդներով պատրաստված ներարկային թմրամիջոցներ և դրանց ստանում եք ոչ ստերիլ ներարկիչներով
դուք սեռական հարաբերություն եք ունեցել այնպիսի մարդու հետ, ով ՄԻԱՎ-ով վարակվելու բարձր ռիսկի խմբում է
ձեզ մոտ կամ ձեր սեռական զուգընկերոջ մոտ առկա է որևէ սեռավարակ։
Մարիամ Շախվերդյան 